Abaturage batandukanye bo mu karere ka Burera bahamya ko iyo bamennye ibiyobyabwenge bababazwa n’amafaranga yabiguze aba agendeyemo ntacyo amariye Abanyarwanda ngo babe bagera ku iterambere rirambye.
Abaturage batangaza ibi mu gihe ku wa kane, tariki ya 22/01/2014, mu murenge wa Cyanika, mu karere ka Burera, hamenwe ibiyobyabwenge birimo kanyanga n’izindi nzoga zo mu mashashi, bifite agaciro k’amafaranga y’u Rwanda abarirwa muri Miliyoni 14.
Ibiyobyabwenge bigaragara mu karere ka Burera birimo kanyanga n’izindi nzoga zo mu mashashi zirimo Blue Sky na Chief Waragi, bituruka muri Uganda.
Ababicuruza cyangwa ababyikorera bazwi ku izina ry’Abarembetsi muri ako karere, bafatwa kenshi babyikoreye babivanye mu gihugu cya uganda. Bakabyamburwa ubundi bagatabwa muri yombi, bagahanwa hakurikijwe amategeko.
Ibiyobyabwenge byafashwe mu gihe runaka babishyira hamwe bikazamenerwa imbere y’imbaga kugira ngo abaturage bahakure isomo ry’ububi bwabyo.
Mu karere ka Burera ntihashira amezi atatu nta biyobyabwenge byangijwe kandi byinshi biguze akayabo. Kuburyo higeze no kumenwa ibifite agaciro k’amafaranga y’u Rwanda miliyoni zibarirwa muri 32.
Abaturage batandukanye bo muri ako karere bavuga ko bababazwa n’ayo mafaranga aba ayoyotse ntacyo amariye Abanyarwanda.
Niyonzima Gaspard agira ati “Iyo bamennye nk’izi miliyoni kandi zagombye gukora ikindi kintu, abana bakarya, bakoze nk’iyindi gahunda atari ibi biyobyabawenge, ubwo nanjye numva bimbabaje cyane!”
Nyiranzabonimpa Vestine yungamo ati “Iyo bamennye ibintu nk’ibi, ni uko abantu banze kubicikaho, naho igihugu kiba kiri guhomba! Nonese ntiharimo amafaranga menshi! Yakagombye kumfasha cyangwa wowe akagufasha!”
Aba baturage bakomeza bavuga ko ibiyobyabwenge bikwiye kurwanywa bigacika burundu. Ababicuruza bagashaka ibindi bacuruza bibinjiriza amafaranga bakareka guhombya igihugu.
Gutanga amakuru
Ubuyobozi bw’akarere ka Burera bukomeza gushishikariza abaturage kurwanya ibiyobybwenge, batanga amakuru y’aho byaba biri cyangwa se ay’ababicuruza.
Nyamara ngo bamwe mu baturage nta makuru batanga ahubwo ngo bagakingira ikibaba cyangwa bagahishira ababyikoreye n’ababicuruza. Gusa ariko bamwe mu baturage bavuga ko banga gutanga amakuru batinya kugirirwa n’Abarembetsi.
Ngo iyo umuturage atanze nk’amakuru abo barembetsi bakabimenya, bamugirira nabi haba kumurandurira imyaka, kumutwikira inzu cyangwa kumwicira itungo.
Abandi baturage bahamya ko ariko hari abahishira Abarembetsi kuko babifitemo izindi nyungo z’amafaranga cyangwa babasigira kanyanga yo kunywa; nk’uko Nyiranzabonimpa Vestine abisobanura.
Agira ati “Ni uko hari abantu babahishira. Sinabamenya! Nonese ko banyura mu mihanda hirya no hino, wamenya babisohoreza mu yahe mago (ingo)! Hari nkaho basohorera (bagera) bakabibikamo (ibiyobyabwenge) ariko sinahamenya!”
Nubwo ubuyobozi bw’akarere ka Burera bukomeza gusaba abaturage kurwanya ibiyobyabwenge bigaragara ko bidacika burundu. Abaturage bavuga ko kimwe mu bituma bidacika burundu ari amafaranga abibamo.
Ngo ijerekani ya litiro 20 ya kanyanga igura amafaranga y’u Rwanda ibihumbi 12 muri Uganda. Ngo iyo igeze mu Rwanda igura amafaranga y’u Rwanda ibihumbi 40 bitewe n’aho igurishirijwe.